Go er borðleikur sem á rætur sínar að rekja til Kína til forna. Sumir sagnfræðingar halda því fram að leikurinn geti verið eldri en 4000 ára en almennt er fallist á að hann sé að minnsta kosti 3000 ára gamall. Samkvæmt þjóðsögum á kínverskur keisari að hafa fundið leikinn upp meir en 2000 árum fyrir Krist til þess að siða son sinn og kenna honum að hugsa. Markmið hans er einfalt; að umkringja og ná yfirráðum yfir stærra svæði á borðinu en andstæðingurinn. Leikmenn skiptast á að leggja niður steina, svarta og hvíta, sem upp frá því eru ekki hreyfðir nema þeir séu handsamaðir. Þá eru þeir teknir af borðinu.

Stærð borðanna sem Go er leikið á er ekki fastákveðin en þó eru þau yfirleitt 9x9, 13x13 eða 19x19 reitir að stærð. 19x19 er algengasta stærðin og sú sem notuð er í víðast hvar í keppni og leik en smærri borðin henta vel fyrir styttri leiki og fyrir byrjendur að læra. Borðin sem sjá má á myndunum hér að ofan og neðan eru 19 reitir á kant.

Eitt að því fyrsta sem fólk tekur eftir þegar það fylgist með goleik er að steinunum er leikið á samskeytum línanna, ekki inn í kassana sem þær mynda; þannig eru borð 19 reitir á kant en ekki 18. Á þetta stórum borðum eru möguleikarnir svimandi margir. Mönnum hefur reiknast til að möguleikar á mismunandi leikjum á 19x19 borði séu fleiri en frumeindir í alheimnum. Leikurinn sjálfur er þó ekki eins flókinn og þeir útreikningar gefa til kynna og fremur einfaldur og auðlærður.

Nánar um reglur og gang leiksins á wiki.igo.is. Eins eru helstu reglur reifaðar í kynningarbæklingi félagsins.